मंगलबार, कार्तिक १० २०८३
मंगलबार, कार्तिक १० २०८३
मंगलबार, भाद्र ९ २०८३
बारा । बाराको जीतपुरसिमरा उपमहानगरपालिका–१ की तीन वर्षीया गरिमा चौधरीको बलात्कारपछि हत्या प्रकरणमा प्रहरीले हालसम्म नौ जनालाई पक्राउ गरेको छ।
घटनाको अनुसन्धानलाई थप फराकिलो बनाउँदै प्रहरीले घटनासँग प्रत्यक्ष वा अप्रत्यक्ष रूपमा जोडिएको हुनसक्ने व्यक्तिहरूमाथि अनुसन्धान अघि बढाएको हो।
जिल्ला प्रहरी कार्यालय बाराका अनुसार प्रारम्भिक अनुसन्धानका क्रममा जीतपुरसिमरा–१ का २४ वर्षीय प्रोग्रेस चौधरी र एक १६ वर्षीय नाबालक पक्राउ परेका थिए। कानुनी प्रावधानअनुसार प्रहरीले नाबालकको वास्तविक नाम सार्वजनिक गरेको छैन।
अनुसन्धान अघि बढाउँदै प्रहरीले इन्द्रजित चौधरी, पुष्पा चौधरी, ममता चौधरी, शेख हुस्मुदिन आलम, टेकबहादुर थापा मगर र नवीन वि.क.लाई पनि पक्राउ गरेको जनाएको छ। नाबालकको हकमा प्रहरीले परिवर्तित नाम प्रयोग गरेको छ।
पछिल्लो चरणमा जीतपुरसिमरा–२ का १४ वर्षीय प्रदीप खड्का पक्राउ परेका छन्। उनी कक्षा ९ मा अध्ययनरत बालक रहेको प्रहरीले जनाएको छ। उनी पक्राउ परेसँगै घटनामा पक्राउ पर्नेको संख्या नौ पुगेको हो।
प्रहरीले पक्राउ परेकाहरूमाथि अपहरण तथा शरीर बन्धक, जबरजस्ती करणी र कर्तव्य ज्यानसम्बन्धी कसुरमा अनुसन्धान अघि बढाएको छ। बारा जिल्ला अदालत कलैयाबाट पहिलो चरणमा चार दिन र दोस्रो चरणमा पाँच दिनको म्याद थप गरी अनुसन्धान भइरहेको जिल्ला प्रहरी कार्यालय बाराले जनाएको छ।
अनुसन्धानका क्रममा पक्राउ परेकाहरूको बयान लिनुका साथै घटनास्थलबाट प्राप्त प्रमाण, उनीहरूबीच भएको आपसी सम्पर्क तथा घटनासँग सम्बन्धित अन्य व्यक्तिको भूमिकाबारे समेत अनुसन्धान भइरहेको प्रहरीले जनाएको छ।
यसैबीच, घटनाका मुख्य आरोपित भनिएका नाबालकसँग चिकित्सकले सोधपुछ गरिरहेको दृश्य समावेश भएको भिडियो सामाजिक सञ्जालमा सार्वजनिक भएपछि अनुसन्धान प्रक्रियाको गोपनीयता तथा बाल न्यायसम्बन्धी संवेदनशील विषयमा प्रश्न उठेको छ।
बयान तथा अनुसन्धानका क्रममा खिचिएको उक्त भिडियो सामाजिक सञ्जालमा सार्वजनिक भएपछि प्रहरी प्रधान कार्यालयले समेत घटनाबारे छुट्टै अनुसन्धान थालेको जनाएको छ। भिडियो लिक गरेको आरोपमा प्रहरी हवलदार कुमार विकलाई पक्राउ गरी अनुसन्धान अघि बढाइएको छ।
प्रहरीले गरिमा चौधरी हत्या प्रकरणमा अनुसन्धानको दायरा विस्तार गर्दै पक्राउ परेकाहरूको संलग्नता, घटनाको वास्तविकता तथा अन्य व्यक्तिको भूमिका भए–नभएको विषयमा थप प्रमाण संकलन गरिरहेको जनाएको छ। अनुसन्धान जारी रहेकाले पक्राउ परेका सबै व्यक्ति दोषी प्रमाणित भइसकेका भने छैनन्।
