गरिमा बिकास बैंक र नेशनल प्याथ ल्याबबिच सम्झौंता

गरिमा विकास बैंक र नेशनल प्याथ ल्याबबीच कर्मचारी तथा सेवाग्राहीलाई स्वास्थ्य परीक्षणमा विशेष छुट दिने सम्झौता भएको छ । बैंक र नेशनल प्याथ ल्याब बीच भएको सम्झौंता अनुसार बैंकका कर्मचारी र ग्राहकहरूलाई प्रयोगशाला परीक्षण सेवामा छुटको व्यवस्था गरिएको हो ।

सम्झौता अनुसार गरिमा विकास बैंकका कर्मचारीले नेशनल प्याथ ल्याबमा सामान्य प्याथोलोजी परीक्षण सेवामा २० प्रतिशत छुट र उच्चस्तरीय विशेषज्ञ परीक्षण सेवामा १० प्रतिशत छुट पाउनेछन् । यसैगरी बैंकका सेवाग्राहीले सामान्य प्याथोलोजी परीक्षणमा १० प्रतिशत तथा उच्चस्तरीय विशेषज्ञ परीक्षणमा पाँच प्रतिशत छुट प्राप्त गर्न सक्नेछन् । नेशनल प्याथ ल्याबमा यो छुट गरिमा विकास बैंकको डेबिट कार्ड, क्रेडिट कार्ड, प्रिपेड कार्ड वा बैंकको स्मार्ट भुक्तानी माध्यमबाट भुक्तानी गर्दा मात्र लागू हुने सम्झौतामा उल्लेख छ । सम्झौताको मुख्य उद्देश्य बैंकका कर्मचारी, ग्राहक तथा सम्बन्धित स्वास्थ्य संस्थाका कर्मचारीहरूलाई लक्षित गर्दै गुणस्तरीय स्वास्थ्य सेवा तथा सहुलियत उपलब्ध गराउनु रहेको बैकले जानकारी दिएको छ । दुवै पक्षले सम्झौतामा उल्लेखित सर्त तथा मापदण्ड पूर्ण रूपमा पालना गर्दै यो सहुलियत योजना प्रभावकारी रूपमा कार्यान्वयन गर्ने प्रतिबद्धता जनाएका छन् ।

बैंकले यो व्यवस्थामार्फत आफ्ना कर्मचारी र सेवाग्राहीलाई स्वास्थ्यप्रति सचेत रहन प्रोत्साहन गर्ने र नियमित स्वास्थ्य परीक्षणलाई थप सुलभ बनाउने लक्ष्य राखेको छ । नेशनल प्याथ ल्याबसँगको यो सहकार्यले सेवाग्राहीहरूलाई तुलनात्मक रूपमा कम लागतमा गुणस्तरीय स्वास्थ्य परीक्षण सेवा उपलब्ध गराउने अपेक्षा गरिएको बैकको भनाई छ ।