मंगलबार, कार्तिक १७ २०८३
मंगलबार, कार्तिक १७ २०८३
हामी संसदमा प्रधानन्त्रीको जवाफ खोज्छौं, उहाँ सामाजिक सञ्जालमा जवाफ दिनुहुन्छ– खुश्बु ओली
बिहिबार, बैशाख ३१ २०८३
काठमाडौं । राष्ट्रिय प्रजातन्त्र पार्टी (राप्रपा) ले प्रधानमन्त्री बालेन्द्र शाह संसदप्रति अनुत्तरदायी भएको भन्दै आपत्ति जनाएको छ ।
प्रतिनिधिसभाको बैठकमा बोल्दै राप्रपाकी प्रमुख सचेतक खुश्बु ओलीले प्रधानमन्त्रीले संसदीय अभ्यास र मर्यादालाई उपेक्षा गरेको आरोप लगाइन् ।
उनले भनिन्, ‘प्रधानमन्त्री पहिलो अधिवेशनमा नबोली जानुभयो, दोस्रो अधिवेशनमा आफ्नै नीति तथा कार्यक्रमको छलफल चलिरहँदा बीचमै उठेर हिँड्नुभयो । हामी सदनमा सुकुम्बासी र संवैधानिक परिषद्का कुरा उठाउँछौँ, तर प्रधानमन्त्री सामाजिक सञ्जालको पोस्टमार्फत जवाफ दिनुहुन्छ । यो संसदीय अभ्यासप्रति अनुत्तरदायी हुने एउटा प्रवृत्ति (प्याटर्न) नै बनेको छ ।’
उनले लोकतन्त्र केवल निर्वाचन जित्ने प्रणाली मात्र नभई निरन्तर संवादको अभ्यास भएको उल्लेख गर्दै वैदिक कालदेखि नै संवाद र सामूहिक निर्णयको परम्परा रहेको स्मरण गइन् ।
ओलीले प्रधानमन्त्रीको संसदमा न्यून उपस्थिति प्रति आलोचना गर्दै उनी संसदीय अभ्यासप्रति अनिच्छुक देखिएको दाबी गरिन् । संसदमा देशभरका प्रतिनिधिमूलक आवाजहरू रहने भएकाले प्रधानमन्त्रीको सहभागिता औपचारिकता मात्र नभई जनताप्रतिको जवाफदेहिताका लागि अनिवार्य रहेको उनको भनाइ थियो ।
उनले प्रधानमन्त्रीलाई सामाजिक सञ्जालमा सीमित नभई सदनमै उपस्थित भएर जवाफदेही बन्न आग्रह गर्दै सभामुखमार्फत पनि ध्यानाकर्षण गराइन् ।
