बिहिबार, साउन १४ २०८३
बिहिबार, साउन १४ २०८३
सोमबार, बैशाख २८ २०८३
काठमाडौं ।टर्किस एयरको इस्तानबुलबाट काठमाडौं आएको टीके–७२६ नम्बरको विमान त्रिभुवन अन्तर्राष्ट्रिय विमानस्थलमा अवतरण गर्ने क्रममा आगलागी भएको छ । दमकलको सहायतामा आगो नियन्त्रणमा लिइएको छ ।
नेपाल नागरिक उड्डयन प्राधिकरण (क्यान)का सूचना अधिकारी ज्ञानेन्द्र भुलका अनुसार विमानमा रहेका सबै यात्रु सुरक्षित रहेका छन् । यात्रुहरुलाई इमर्जेन्सी ढोका खोलेर उद्धार गरिएको थियो ।
उनका अनुसार विमानमा चार बालबालिकासहित २७७ यात्रु सवार थिए । उद्धारका क्रममा केही यात्रु सामान्य घाइते भएका छन् । विमानमा केही शव तथा सामानसमेत रहेको जनाइएको छ ।
आज बिहान करिब पौने ७ बजेतिर अवतरण गर्ने क्रममा विमानको चक्कामा आगो लागेको थियो । आगलागीपछि विमान धावनमार्गमै रोकिएको छ ।
विमान धावनमार्गमै अड्किएकाले त्रिभुवन अन्तर्राष्ट्रिय विमानस्थलमा अन्तर्राष्ट्रिय उडान तथा अवतरण प्रभावित भएका थिए। विशेषगरी ठूला जहाजहरूको नियमित उडान तालिकामा असर परेको जनाइएको छ ।
आगलागी भएपछि बन्द भएको त्रिभुवन अन्तरराष्ट्रिय विमानस्थल डेढ घण्टापछि सञ्चालनमा आएको छ ।
विमानस्थलका निमित्त महाप्रबन्धक टेकनाथ सिटौलाका अनुसार आज बिहान ६ः४५ बजेदेखि बन्द भएको विमानस्थल करिब डेढ घण्टापछि सञ्चालनमा आएको हो । बिहान ८ः३० बजे एयर इन्डिया र ८ः३५ बजे फ्लाइ दुवई अवतरण गरिसकेका छन् भने केही विमानले उडान पनि भरिसकेका छन् ।
