काठमाडौं । भारततर्फ विकसित भएको हावाहुरीसहितको वर्षा गराउने बादल नेपालतर्फ सर्दै गरेको जल तथा मौसम विज्ञान विभागले जनाएको छ। मौसमविद् सरोज पुडासैनीका अनुसार उक्त प्रणाली हाल कञ्चनपुर आसपास आइपुगेको छ र पश्चिमी भूभाग हुँदै नेपाल प्रवेश गर्ने क्रममा रहेको छ।
मौसम पूर्वानुमान महाशाखाले बुधबार विशेष बुलेटिन जारी गर्दै बुधबार अपराह्न ४ बजेदेखि बिहीबार बिहान ६ः४५ बजेसम्म तीव्र गतिको हावाहुरीको सम्भावना रहेको चेतावनी दिएको छ। विभागका अनुसार हावाहुरीको गति २०–२५ मिटर प्रतिसेकेन्डसम्म पुग्न सक्ने अनुमान गरिएको छ।
पुडासैनीका अनुसार पश्चिमी न्यूनचापीय प्रणाली र पूर्वी भूभागमा बनेको अर्को प्रणाली आपसमा प्रभाव पार्दा यस्तो मौसमीय अवस्था सिर्जना भएको हो।
महाशाखाले सुदूरपश्चिम, लुम्बिनी, गण्डकी, बागमती, मधेस र कोशी प्रदेशका विभिन्न जिल्लामा हावाहुरीको जोखिम रहने जनाएको छ। साथै धेरै स्थानमा मेघगर्जन, चट्याङ र असिनासहित मध्यमदेखि भारी वर्षा तथा केही पहाडी भूभागमा हिमपातको सम्भावना पनि देखिएको छ।
यसैबीच राष्ट्रिय विपद् जोखिम न्यूनीकरण तथा व्यवस्थापन प्राधिकरणले सतर्कता अपनाउन आग्रह गर्दै घरबाहिर ननिस्कन, झ्यालढोका मजबुत बनाउन, कमजोर संरचनाबाट टाढा रहन र बिजुलीका तार तथा पोल नजिक नजान सुझाव दिएको छ।
हावाहुरीका कारण ढुंगा, वस्तु उडेर चोटपटक लाग्ने जोखिम रहेकाले उच्च सतर्कता अपनाउन पनि प्राधिकरणले आग्रह गरेको छ।
