बुधबार, कार्तिक ११ २०८३
बुधबार, कार्तिक ११ २०८३
बुधबार, चैत्र ११ २०८२
काठमाडौं । अमेरिकी राष्ट्रपति डोनाल्ड ट्रम्पले अमेरिका इरानविरुद्धको युद्धमा सफल भएको दाबी गरेका छन् । उनका अनुसार इरानका नौसेना, वायुसेना तथा राडार प्रणाली अहिले प्रभावहीन बनेका छन् ।
मंगलबार ह्वाइट हाउसमा सञ्चारकर्मीसँग कुरा गर्दै ट्रम्पले अमेरिकी विमानहरू तेहरानमाथि उडिरहेको र अमेरिकाले आवश्यक परे जेपनि गर्न सक्ने बताएका छन् ।
ट्रम्पका अनुसार इरानले आणविक हतियार नबनाउने सहमतिसमेत जनाएको छ । उनले दुई देशबीच वार्ता जारी रहेको र इरान सम्झौतामा पुग्न इच्छुक रहेको दाबी गरे ।
‘हाम्रो पहिलो सर्त भनेको इरानले आणविक हतियार बनाउने छैन, जसमा सहमति भइसकेको छ,’ ट्रम्पले भने ।
तर इरानतर्फबाट यस विषयमा हालसम्म कुनै आधिकारिक प्रतिक्रिया आएको छैन ।
इराकमा हवाई आक्रमण, १५ जना हसद अल–शाबी लडाकु मारिए
इराकमा भएको हवाई आक्रमणमा हसद अल–शाबी गठबन्धनका १५ जना सदस्य मारिएका छन् । यो आक्रमणलाई इरान–अमेरिकी युद्ध सुरु भएपछिको सबैभन्दा घातक घटनाका रूपमा हेरिएको छ ।
फेब्रुअरी २८ मा इजरायल र संयुक्त राज्य अमेरिकाले इरानमाथि आक्रमण सुरु गरेपछि यो युद्ध इराकसम्म फैलिएको छ । इराकी सशस्त्र बलमा समावेश इरान समर्थित ब्रिगेडहरूसँग सम्बन्धित हसद अल–शाबीले आफ्ना लडाकूहरूको मृत्युको जिम्मा संयुक्त अमेरिकी–इजरायली आक्रमणमा लगाएको छ ।
स्वायत्त इराकी कुर्दिस्तानमा भएको ब्यालेस्टिक मिसाइल आक्रमणमा छ पेसमेर्गा लडाकू मारिएका छन् । इराकी अधिकारीहरूले आक्रमणलाई ‘शत्रुतापूर्ण र विश्वासघाती’ भनेका छन् र यसमा इरानको भूमिका रहेको आरोप लगाएका छन् । अमेरिका र इरान कसैले पनि यस घटनामा टिप्पणी गरेका छैनन् ।
गत वर्षहरूमा, इरान समर्थक सशस्त्र समूहहरूले इराक र क्षेत्रभर अमेरिकी लक्ष्यमा आक्रमणको जिम्मेवारी लिँदै आएका छन् भने अमेरिकी–इजरायली कारवाहीले ती समूहहरूलाई पनि लक्षित गरेको छ । पेन्टागनले हालै इराकमा इरान समर्थक समूहविरुद्ध हेलिकप्टर आक्रमण भएको स्वीकार गरेको थियो ।
हसद अल–शाबीले विज्ञप्तिमा राजनीतिक पक्षहरूलाई जिम्मेवारी लिन र अमेरिकी उल्लङ्घनको सामना गर्न आग्रह गरेको छ । कुर्द अधिकारीहरूका अनुसार छवटा इरानी ब्यालेस्टिक मिसाइलले पेसमेर्गालाई लक्षित गरेको थियो, जसमा छ जना मारिएका र ३० जना घाइते भएका छन् ।
विशेषज्ञहरूले यस घटनालाई इराकमा द्वन्द्वको जटिलता र क्षेत्रीय सुरक्षा जोखिमको सङ्केतका रूपमा मूल्याङ्कन गरेका छन् । युद्धले इराकको राजनीतिक र सुरक्षा सन्तुलनमा ठूलो प्रभाव पारिरहेको छ र कुर्दहरूले इरान–अमेरिका युद्धमा तटस्थ रहन प्रयास गरिरहेका छन् ।
