बिहिबार, साउन १४ २०८३
बिहिबार, साउन १४ २०८३
काठमाडौं वैशाख, ३०–
नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले केही बर्षत्रिै काठमाडौंमा रेृल आउने बताएका छन् । सोमबार राष्ट्रिय विभूति सीताको जन्म जयन्ती समारोहलाई काठमाडौंमा सम्बोधन गर्दै अध्यक्ष प्रचण्डले चीनको ल्हासाबाट आउने रेललाई लुम्बिनी र पोखरासम्म पुर्याउने बताएका हुन् ।
पूर्वप्रधानमन्त्री समेत रहेका प्रचण्डले भने, ‘अब केही वर्षभित्रै, तपाईं हामी जीवित रहँदारहँदै रेल आउने भैसकेको छ ।’
ल्हासाबाट काठमाडौं रेल ल्याउने कुरा सुरुमा सपना जस्तो लागे पनि अब त्यो विपनामा परिणत हुने प्रचण्डको भनाइ छ ।
प्रचण्डले आफू प्रधानमन्त्री हुँदा सबैभन्दा पहिले चिनियाँ राष्ट्रपतिलाई ल्हासाबाट रेल ल्याउने र भृकुटीले खेलेको भूमिकालाई स्थापित गर्न नयाँ अभियान चलाउने कुरा गरेको जानकारी दिँदै अहिले त्यो सपना साकार हुन लागेको बताए ।
‘चीन भ्रमणमा जाँदा मैले त्यहाँका राष्ट्रपतिलाई भनेको थिएँ, ल्हासाबाट काठमाडौं हुँदै पोखरा र लुम्बिनीसम्म रेल लैजाने कुरा । यो सपना साकार पार्न हामीले मिलेर काम गर्नुपर्छ भनेको थिएँ । अहिले मलाई अब यो सपना रहेन । अब त्यो सपना विपनामा साकार हुँदैछ,’ प्रचण्डले भने । ल्हासाबाट रेल नेपाल आएमा पर्यटनको विकासको निम्ति र अर्थतन्त्रको विकासको निम्ति कोशेढुंगा हुने उनले विश्वास व्यक्त गरे ।
नेपालका शक्तिपीठहरु र नेपाल–भारतका शक्तिपीठहरुलाई पनि जोडेर सर्किट बनाउन सकिए धार्मिक पर्यटनको विकासमा क्रान्ति नै आउने उनको दावी छ ।
‘लुम्बिनी, पशुपति र जनकपुरलाई जोड्ने एउटा सर्किट देशभित्रै बनाउन जरुरी छ, । अनि पूर्व पाथिभरादेखि बाजुराको बडिमालीकासम्मका सबै शक्तिपीठहरुलाई जोड्ने शक्तिपीठ सर्किट बनाउन जरुरी छ,’ प्रचण्डले भने ।
अध्यक्ष प्रचण्डले भने, ‘पछिल्लो पटक भारत भ्रमणमा जाँदा नेपाल र भारतका शक्तिपीठहरुलाई मिलाएर एउटा शक्तिपीठ बनाउन सम्भव छ भनेर चर्चा गरेको थिएँ । त्यसलाई सम्भव बनाइयो भने धार्मिक पर्यटनको विकासमा एउटा क्रान्ति नै आउन सक्छ र त्यो धार्मिक पर्यटनको विकासले हामी दुवै देशका जनताको आर्थिक जीवनमा समृद्धिको गुणात्मक ढंगले नयाँ प्रकृतिको जन्म हुनसक्छ भन्ने कुरा भएको थियो ।’
