मकवानपुर प्रहरीद्वारा जुत्ताभित्र र पाईन्टको खल्तीमा लुकाएको सुनसहित एकजना पक्राउ

हेटौंडा वैशाख, २६–
हेटौंडा प्रहरीले अवैध सुनसहित एक जनालाई पक्राउ गरेको छ ।  बिहिबार काठमाडौंबाट वीरगञ्जतर्फ जाँदै गरेको ना ८ ख ३७९२ नम्बरको बस चेकजाँचका क्रममा प्रहरीले  पूर्वपश्चिम राजमार्ग अन्तर्गत रातमाटेमा उक्त सुनसहित २९ वर्षका किशोर ल्वागुनलाई पक्राउ गरेको हो ।   भोजपुर षडानन्द नगरपालिका ४ का २९ बर्षीय ल्वागुनको साथबाट  प्रहरीले १ किलो ६ सय ४९ ग्राम ८ सय ९० मिलीग्राम सुन बरामद गरेको हो । ल्वागुनले लगाएको दुबै खुट्टाको जुत्ताभित्र र पाईन्टको खल्तीमा लुकाएर ल्याएको सुन बरामद गरिएको प्रहरीको भनाइ छ । मकवानपुरका प्रहरी उपरीक्षक मुकेशकुमार सिंहका अनुसार इलाका प्रहरी कार्यालय पशुपतिनगरका प्रहरी निरीक्षक अरुणकुमार कुशुवाहको टोलीले हेटौंडा १५ रातोमाटेबाट सुनसिहत उनलाई पक्राउ गरेको हो ।  प्रहरी उपरीक्षक सिंहले जनाए अनुसार  सुनको मूल्य ८५ लाख ८६ हजार २६ रुपैयाँको रहेको छ । यसअघि पनि ल्वागुन सुन  कारोबारमा संलग्न रहेकोमा पक्राउ परेका थिए ।   दोस्रो पटक फेरी सुन  लैजादै गर्दा उनी  पक्राउ परेको बताइएको छ । बरामद सुन र ल्वागुनलाई राजश्व अनुसन्धान कार्यालय पथलैया बुझाउने प्रहरीले बताएको छ । 
मकवानपुरमा यसरी अवैध सुन बरामद गरिएको  पहिलो पटक हो ।