बिहिबार, साउन १४ २०८३
बिहिबार, साउन १४ २०८३
कञ्चनपुर चैत, ८–
भारतीय पक्षले कञ्चनपुरको भीमदत्त नगरपालिका–९ ब्रम्हदेवमा सडक निर्माणमा अवरोध गरेको छ ।
भारतीय पक्षले शुक्रबार ब्रम्हेदव–टनकपुर जोड्ने नेपाल तर्फको जमिनमा सडक कालोपत्रे गर्दा अवरोध गरेको हो । भीमदत्त नगरपालिका–९ का वडाध्यक्ष राम नाथले आफ्नै भूमिमा सडक निर्माण गर्दा भारतीय पक्षले अवरोध गरेको जानकारी गराए ।
एसएसबीले विवादित क्षेत्र भन्दै निर्माण कार्य रोकिदिएको उनको भनाइ छ । एसएसबीका जवान आएर माथिको आदेश भन्दै निर्माण कार्य रोकेका हुन् । सडक कालोपत्रे गर्नका लागि न्यू जोशी कस्ट्रक्सनले जिम्मा पाएको थियो ।
न्यू जोशी कस्ट्रक्सनलका सञ्चालक भीमराज जोशीले शुक्रबारदेखि काम शुरु गर्ने क्रममा एसएसबीले अवरोध गरेको बताए । नेपाल तर्फको १.३८ मिटर भूमी कालोपत्रेका लागि अवरोध गरेपछि सडक कहिले कालोपत्रे हुने भन्ने विषय अन्यौल भएको छ ।
एसएसबीले काम रोकेपछि सडकमै जेसिभी राखेको उनले बताए । गत साउनमा भारतीय पक्षले टनकपुर पुलदेखि ब्रम्हदेब बजारसम्म एकलौटी सडक निर्माण गरेपछि नेपाली पक्षबाट त्यसको बिरोध भएको थियो । त्यतिबेला दुवै देशबीच आ–आफ्नो देशको जमिनमा आफैले सडक निर्माण गर्ने सहमति भएको थियो ।
कञ्चनपुरका प्रमुख जिल्ला अधिकारी सुुशिल बैद्यले भारतीय पक्षसँग छलफल गरे समाधान गरिने बताए ।
