बिहिबार, साउन १४ २०८३
बिहिबार, साउन १४ २०८३
काठमाडौं माघ, २१–
राष्ट्रिय प्रजातन्त्र पार्टीले नेपालको इतिहासमै पहिलो पटक देश टुक्र्याउन चाहने शक्ति सतहमा देखिएको जनाएको छ । राप्रपाले त्यस्तो विखण्डनकारी शक्तिविरुद्ध दृढतापूर्वक उभिन सरकारलाई आग्रह समेत गरेको छ ।
आइतबार र सोमबार बसेको केन्द्रीय समितिको निर्णयमा राप्रपाले राष्ट्रिय अखण्डताको रक्षा, सुरक्षा संवेदनशीलता जस्ता विषयमा सरकारलाई गम्भीर बन्न र त्यस्ता गतिविधि नियन्त्रण गर्न आग्रह गरेको हो ।
विखण्डनकारी शक्तिले तराईका विभिन्न भागमा अराजकता सिर्जना गर्ने सम्भावना देखिएको राप्रपाको भनाइ छ ।
पछिल्लो समय हिन्दू, बौद्ध र किरात धर्माबलम्बीलाई जबर्जस्ती धर्म परिवर्तन गराइएको भन्दै यसलाई नियन्त्रण गर्न समेत राप्रपाले माग गरेको छ । ‘धर्म परिवर्तनको गतिलाई निस्तेज र नियन्त्रण गर्न, सदियौंदेखिको नेपाली समाजमा कायम रहदै आएको साँस्कृतिक एकता र सद्भाव खल्बलिन नदिन र देशलाई धार्मिक द्वन्द्वको दलदलमा फस्नबाट जोगाउन उपयुक्त कदम चाल्न राप्रपा सरकारसँग माग गर्दछ’ बैठकको निर्णयमा भनिएको छ ।
राप्रपाले विदेशका बैंकमा गैरकानूनी सम्पत्ति लुकाउने र विदेशी लगानीका रुपमा उक्त पैसा ल्याउने क्रम बढेको भन्दै छानबिन गरी अवैध सम्पत्ति जफत गर्न सरकारसँग माग गरेको छ । त्यस्तै वाइडबडी खरिद, ३३ केजी सुनकाण्ड, एनसेल करछली, बुढिगण्डकी परियोजनालगायतका आर्थिक अपचलन र ठूला भ्रष्टाचारको दोषीलाई कारबाही गर्न पनि राप्रपाले माग गरेको छ ।
हिन्दूराष्ट्र पुनस्र्थापनालगायतका माग राखी राप्रपाले फागुन १५ देखि ३० गतेसम्म ताप्लेजुङदेखि कञ्चनपुर हुँदै काठमाडौंसम्म मेची महाकाली राष्ट्रिय स्वाभिमान यात्रा गर्ने घोषणा गरेको छ । त्यसअघि फागुन ७ गते देशभरी प्रदर्शन र प्रधानमन्त्री, मुख्यमन्त्री र प्रमुख जिल्लाहरुलाई ज्ञापनपत्र बुझाउने राप्रपाले जनाएको छ ।
