छलकपट गरेर ल्याईएको संघीयताका विपक्षमा संसदमा संशोधन दर्ता गर्ने चित्रबहादुरको घोषणा

काठमाडौं कात्तिक, १२–
राष्ट्रिय जनमोर्चाका अध्यक्ष चित्रबहादुर केसीले आफ्नो पार्टीले संघीयताका विपक्षमा संसदमा संशोधन प्रस्ताव दर्ता गर्ने तयारी थालेको बताएका छन् । उनले नेपालमा संघिय प्रणाली अत्यन्तै खर्चिलो हुने र जनतालाई खर्चको भार मात्र बढाउने खालको भएको बताएका छन् । उनले  छलकपट पूर्ण तरिकाले संघियता लागु गरिएकाले अहिले जनता स्वयम् नै संघियताको विपक्षमा रहेको जिकिर समेत गरे ।  अध्यक्ष  केसीले संघियताको विपक्षमा आफ्नो पार्टीले संसदमा संसोधन प्रस्ताव हाल्न लागेको बताएका छन ।

सोमबार संवाद चौतारीले आयोजना गरेको अन्तर संवाद कार्यक्रममा बोल्दै केसीले आफू संघीयता विरोधी नभई नेपालमा संघीय प्रणालीको मात्रै विरोधी भएको बताए । काँग्रेस एमालेले समेत संघीयता नचाएको तर वाध्यतामा परेर संघियता स्वीकारेको भन्दै उनले संघीयता ठुला दलहरुको आफ्नो एजेण्डा नभई कसैले बोकाईदिएको एजेण्डा भएको समेत उनको भनाई छ ।

साथै उनले नेपालमा संघीय व्यवस्था असफल हुने बाटोमा गइरहेको भन्दै यसलाई जनताले नै असफल बनाइदिने दाबी गर्दै उनले नेपालमा संघीयता भनेको “खर्चन पर्च, काँसी जानुपर्छ” भने जस्तै भएको र अहिले ठुला दलहरुलाई पनि संघीयता “नखाउँ भने दिनभरीको सिकार खाउँ भने कान्छा बाउको अनुहार” भने जस्तै गलपासो भएको बताए ।