बिहिबार, साउन १४ २०८३
बिहिबार, साउन १४ २०८३
काठमाडौ वैशाख, २५–
एमाले माओवादी एकता अन्तिम चरणमा पुगेका समाचार सार्वजनिक भैरहेका बेला एमाले अध्यक्ष केपी शर्मा ओलीसँग माओवादी अध्यक्ष प्रचण्ड आक्रोशित बनेका छन् । अध्यक्ष प्रचण्ड सोमबार प्रधानमन्त्री समेत रहेका अध्यक्ष ओलीको सामाजिक सञ्जाल ट्वीटमार्फत सार्वजनिक अभिव्यक्तिका कारण असन्तुष्ट बनेका हुन् ।
सोमबार ओलीले ‘सत्तासमीकरणको वानी परेकाहरु’ भन्दै ट्वीट गरेका थिए । माओवादी अध्यक्ष प्रचण्डले उक्त ट्वीट आफुप्रति लक्षित रहेको बुझेका छन् ।
पछिल्लो समय पार्टी एकताका लागि ओली र प्रचण्डबीच नियमित संवाद भैरहेका बेला यी दुई नेताबीचको आक्रोश सतहमै देखिन थालेको हो ।
पार्टी एकता संयोजन समितिले एकताका लागि मिल्न वाँकी विषय टुंगाउन दुई अध्यक्षलाई जिम्मा दिएपछि प्रधानमन्त्री ओली र माओवादी अध्यक्ष प्रचण्डवीच धेरै पटक वान टू वान संवाद भएका छन् ।
उनीहरुले आफुहरु एकताका लागि नजिक पुगेको बताईरहेका बेला सामाजिक संजाल मार्फत ओलीको असन्तुष्टि बाहिर आएको हो । मंगलबार सिंहदरवारमा मंगलबार बसेको संसदीय दलको बैठकमा अध्यक्ष प्रचण्डले प्रधानमन्त्री ओलीले सार्वजनिक गरेको अभिव्यक्तिबारे आजै गम्भीर छलफल गर्ने बताएका छन् ।
संसदीय दलको बैठकमा सहभागि एक नेताले बताए अनुसार ओलीको उक्त ट्वीटले निकट भविश्यमा हुन लागेको एकीकरण नै संकटमा पर्ने भन्दै सांसदहरुले वास्तविकता के हो भनेर अध्यक्षसँग जवाफ मागेका थिए ।
जवाफमा अध्यक्ष प्रचण्डले प्रधानमन्त्री ओलीबाट आएको उक्त अभिव्यक्तिबाट आफू समेत आश्चर्यमा परेको भन्दै त्यसबारे आफूले तत्काल कुरा गर्ने जवाफ दिएका थिए ।
सोमबार प्रधानमन्त्री ओलीले आफ्नो सामाजिक सञ्जाल ट्वीटरमा लेखेका थिए ‘हामी विकास र सम्बृद्धिको एजेण्डामा हिँडिरहेका छौं, आफ्नो दुनो सोझ्याउन समीकरण फेरवदलमा मात्रै बानी परेकालाई यसप्रति अरुची हुन सक्छ । लोकतन्त्रमा जनता बलिया हुन्छन् र त्यसको प्रतिविम्ब सरकारका काममा देखापर्छ । किनकी सरकारले जनताबाटै कार्यदेश लिएको हुन्छ । सार्वभौमसत्ता जनतामै थियो र छ ।’
ओलीले ट्वीटमा कुन घटनालाई आधार बनाएर लेखेको भन्ने स्पष्ट थिएन ।
त्यस्तै, पछिल्लो समय सञ्चारमाध्यममा आएका समाचार जस्तो प्रधानमन्त्री ओली र आफूबीच कुनै सहमति नभएको बताएका थिए । उनले आफूहरुबीच चारवटा विषयमा सहमति भयो भन्ने हल्ला आएकोमा कुनै सत्यता नरहेको भन्दै समानताकै आधारमा एकता गर्ने पक्षमा रहेको बताएका थिए । उनले त्यसबाट कुनै दायाँबायाँ हुदैन भन्दै यदि समानतालाई स्वीकार नगरिए एकता नहुने प्रष्ट पारेका थिए ।
यसअघि ओली र प्रचण्डबीच प्रधानमन्त्री, पार्टी अध्यक्षलगायतका विषयमा सहमति भएका खवरहरु आएका थिए । तर, ति खवरहरु पुर्णतया असत्य र कपोकल्पीत रहेको बैठकमा प्रचण्डले प्रष्ट पारेका थिए । त्यस्तै, बजेटबारे छलफल नगरिएकोमा समेत बैठकमा असन्तुष्टि जनाईएको थियो ।
माओवादी सांसदहरुले प्रधानमन्त्रीले मन्त्रीहरुसँग समेत कुनै छलफल नगरेकोप्रति आपत्ति जनाएका थिए ।
प्रचण्डले त्यस विषयमा समेत आजै प्रधानमन्त्रीसँग छलफल गर्ने भन्दै बजेट जनताको जिवनस्तरसँग मिल्ने बनाउन सुझाव दिने बताए । ‘जनताको अपेक्षा पुरा हुनेगरी बजेट ल्याउनुपर्छ, त्यो भएमात्रै बाम सरकारले ल्याएको बास्तविक बजेट हुन्छ । त्यसो भएन भने बाम सरकार र अरु सरकारमा कुनै भिन्नता हुदैन’ प्रचण्डको भनाई थियो ।
