बिहिबार, साउन १४ २०८३
बिहिबार, साउन १४ २०८३
काठमाडौं चैत, ७–
पूर्व प्रधानमन्त्री तथा कांग्रेसका सभापति गिरिजाप्रसाद कोइरालाको आठौं स्मृति दिवस कार्यक्रममा माओवादी केन्द्रका अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ प्रमुख अतिथि बनेका छन् । जी.पी. कोईराला मेमोरियल (सामुदायिक) कलेजले स्मृति दिवसका अवसरमा आयोजना गरेको कार्यक्रममा औपचारिक कार्यक्रममा माओवादी अध्यक्ष प्रचण्ड प्रमुख अतिथि बनेका हुन् ।
शान्ति प्रक्रियाका नायक समेत मानिएका पूर्व प्रधानमन्त्री एवम् कांग्रेसका नेता कोइरालाको २०६६ साल चैत ७ गते ८७ वर्षको उमेरमा निधन भएको थियो । कोइराला नेपाली राजनीतिका शीर्ष व्यक्तित्व एवं पछिल्लो शान्ति र संविधान निर्माण प्रक्रियाका सूत्रधार समेत मानिन्थे ।
स्वर्गीय कोइराला त्यस्तो पात्र हुन् जसले नेपाली राजनीतिमा सबैभन्दा बढी ताली, गाली खाँदै अन्त्यमा नायकको उपाधि पाउन सफल भएका थिए । कोइरालाकै अग्रसरतामा सशस्त्र हिंसा रहेको माओवादी पार्टीलाई शान्ति र प्रजातन्त्रको मूलबाटोमा ल्याइएको थियो ।
शुरुतिर कम्युनिष्टप्रति असहिष्णु देखिएका कोइराला जीवनको उत्तरार्धमा तिनै कम्युनिष्टसँग सहकार्य गर्दै पछिल्लो शान्ति र संविधान निर्माण प्रक्रियाको सूत्रधार बन्नुभएको थियो ।
आफ्नो राजनीतिक जीवनलाई नै दाउमा राखेर माओवादीलाई शान्ति प्रक्रियामा ल्याएको बताउने कोइरालाको अडानले नै संसद पुनस्र्थापना हुँदै मुलुकबाट राजतन्त्रको अन्त्य गरायो ।
