‘नर्मल’ अबस्थामा फर्किने प्रयासमा छु, तर, ‘नर्मल’ अबस्थामा फर्किन सहज भने छैन–प्रचण्ड

काठमाडौं मंसिर, ४–
हिजो मात्र पुत्र वियोग बेहोरेका माओवादी केन्द्रका अध्यक्ष पुष्पकमल दाहाल ‘प्रचण्ड’ले छोरा प्रकाशको श्रदाञ्जलीमा सहभागि हुने तथा श्रदाञ्जली व्यक्त गर्ने सबैलाई धन्यावाद व्यक्त गरेका छन् । सोमबार दाहाल निवास लाजिम्पाटमा उनलाई भेट्न गएकाहरुलाई उनले त्यसो भनेका हुन् । अध्यक्ष प्रचण्डले केही बर्ष पहिले मात्र जेठी छोरी गुमाए लगत्तै फेरि छोरा गुमाउनु पर्दा आफूलाई सम्हालिन कठिन भैरहेको बताए । आफूले जति सक्दो चाँडो ‘नर्मल’ हुने प्रयास गरेको तर, हुन नसकेको जनाए ।

अध्यक्ष प्रचण्डले आफू हिजोको युद्धको मुख्य लिडरसिप भएकाले सबै कुरा भोग्दै आएकाले पनि ‘नर्मल’ अबस्थामा फर्किने प्रयास गर्न सकेको तर, अन्य परिवारलाई नर्मल अबस्थामा फर्किन सहज नभएको जनाए । उनले छोराको श्रदाञ्जलीदेखि दाहासंस्कारसम्म पाएको सबैको साथले आफूहरुलाई धैर्य गर्ने शक्ति प्रादान भएको भन्दै सबैलाई धन्यावाद समेत दिएका हुन् । 
आईतबार प्रचण्डपुत्र प्रकाशको ३६ बर्षकै उमेरमा ह्दयघातका कारण नर्भिक अस्पतालमा असमायिक निधन भएको थियो । सोमबार पनि दाहाल निवासमा प्रकाश दाहालप्रति श्रदाञ्जली दिनेहरुको भिड लागेको छ । प्रकाश दाहालको तस्विरमा फूल चढाउनेहरुको ठुलै घुइचो लागेको छ ।