शुक्रबार, कार्तिक १३ २०८३
शुक्रबार, कार्तिक १३ २०८३
काठमाडौं । लगानीकर्ताका दुई संगठनले शुक्रबार अर्थमन्त्री जनार्दन शर्मालाई आईपीओमा १० कित्ते नीतिलाई निरन्तरता दिनुपर्ने बताएका छन् । नेपाल इन्भेष्टर्स फोरम र सेयर लगानीकर्ता संघले संयुक्त रुपमा अर्थमन्त्री शर्मालाई भेटेर यस्तो माग राखेका हुन ।
इन्भेष्टर्स फोरम अध्यक्ष छोटेलाल रौनियार र शेयर लगानीकर्ता संघका अध्यक्ष उत्तम अर्याल लगायतका प्रतिनिधिले शेयर ब्रोकर कमिसन घटाउनुपर्ने, पुँजीगत लाभकरको दर घटाउनुपर्ने र नेपालभर सेयरको दोस्रो बजारको पहुँच पुर्याउनुपर्ने लगायतका माग राखेका छन् ।
पूँजी बजारप्रति सरकार अनुदार बन्न नहुने भन्दै नेपालको पूँजी बजार देशको वार्षिक बजेटभन्दा साढे दुई गुणा ठूलो आकारको भएको बताए । पूँजी बजारले कुल ग्राहस्थ उत्पादनको करिब ८५ प्रतिशत स्थान ओगटेको दाबी गरेका छन् भने राजस्वमा वार्षिक १४ अर्ब ६ करोड ४२ लाख ५५ हजार ८२३ पुँजीगत लाभकर बुझाएको दावी गरेका छन् ।
गैरआवासीय नेपालीहरू तथा करिव ६० लाख युवाहरूलाई स्वदेशमा नै रोजगारीको सिर्जना गरी औद्योगिकीकरण र यान्त्रिकीकरणमार्फत सवल राष्ट्र निर्माणमा सरिक बनाउन माग गरिएको छ । त्यस्तै, स्थायी अर्थोपार्जन एवं वेरोजगारी समस्याको समाधान गर्ने उद्देश्य पूर्ति गर्नका लागि २०६५ सालदेखि धितोपत्र बोर्ड समेतको कार्य सूचीमा रहेको विषय गैरआवासीय नेपाली लगायत विदेशिएका श्रमिक युवा वर्गलाई पुँजीबजारमा सहज प्रवेशको व्यवस्था गरिनु पर्ने आफ्नो मागपत्रमा समावेश गरेका छन।
