मंगलबार, कार्तिक १० २०८३
मंगलबार, कार्तिक १० २०८३
आइतबार, कार्तिक ८ २०८३
काठमाडौं । नेपाली कांग्रेसले यस वर्ष कोजाग्रत पूर्णिमाको अवसरमा आयोजना गर्दै आएको चियापान कार्यक्रम नगर्ने भएको छ। प्राकृतिक विपत्तिका कारण देश शोकमा रहेकाले यस वर्ष कार्यक्रम स्थगित गरिएको कांग्रेसले जनाएको छ।
कांग्रेसले संस्थापक नेता बीपी कोइरालाको पालादेखि हरेक वर्ष कोजाग्रत पूर्णिमाका दिन चियापान समारोह आयोजना गर्दै आएको थियो। तर, यस वर्ष बाढीपहिरोलगायत प्राकृतिक विपत्तिबाट ठूलो जनधनको क्षति भएको भन्दै कार्यक्रम नगर्ने निर्णय गरेको हो।
कांग्रेसका कार्यवाहक मुख्य सचिव कृष्णप्रसाद दुलालले कात्तिक १ गते विज्ञप्ति जारी गर्दै विपत्तिका कारण चियापान कार्यक्रम आयोजना नगरिने जानकारी दिएका थिए।
विज्ञप्तिमा भोटेकोशीमा आएको बाढीका कारण ठूलो मानवीय क्षति भएको र पाँच हजारभन्दा बढी व्यक्ति बेपत्ता रहेको उल्लेख गरिएको थियो। बूढीगण्डकीमा आएको बाढीले समेत थप जनधनको क्षति पुर्याएको भन्दै यस्तो दुःखद घडीमा चियापान कार्यक्रम नगर्ने निर्णय गरिएको कांग्रेसले जनाएको छ।
कांग्रेसको चियापान समारोहको इतिहास बीपी कोइरालाको स्वदेश फिर्तीसँग जोडिएको छ। २०३३ पुस १६ गते राष्ट्रिय एकता तथा मेलमिलापको नीति लिएर स्वदेश फर्किएका बीपीले २०३४ सालको कोजाग्रत पूर्णिमाका दिन चियापान समारोह आयोजना गरेका थिए।
त्यसयता कांग्रेसले हरेक वर्ष कोजाग्रत पूर्णिमाका दिन चियापान कार्यक्रम आयोजना गर्दै आएको थियो। यस कार्यक्रमलाई राजनीतिक दलका नेता, कार्यकर्ता तथा विभिन्न क्षेत्रका व्यक्तिबीच भेटघाट, शुभकामना आदानप्रदान र आपसी सद्भाव अभिवृद्धि गर्ने अवसरका रूपमा लिइँदै आएको छ।
