१०औँ राष्ट्रिय खेलकुदको नयाँ मिति तय, मंसिर १६ देखि २९ गतेसम्म कर्णालीमा हुने

काठमाडौं । लामो समयदेखि अन्योलमा रहेको १०औँ बृहत् राष्ट्रिय खेलकुद प्रतियोगिताको नयाँ मिति तय भएको छ। राष्ट्रिय खेलकुद परिषद् (राखेप)को १२५औँ बोर्ड बैठकले आगामी मंसिर १६ देखि २९ गतेसम्म प्रतियोगिता आयोजना गर्ने निर्णय गरेको हो।

युवा तथा खेलकुदमन्त्री सस्मित पोखरेलको अध्यक्षतामा बिहीबार बसेको बोर्ड बैठकले १०औँ राष्ट्रिय खेलकुद प्रतियोगिता कर्णाली प्रदेशमा आयोजना गर्ने निर्णय गरेको हो। प्रतियोगिताको मुख्य केन्द्र कर्णाली प्रदेशको राजधानी सुर्खेत रहनेछ भने प्रदेशका विभिन्न जिल्लामा समेत खेलकुदका कार्यक्रम सञ्चालन गरिनेछन्।

नवौँ राष्ट्रिय खेलकुद प्रतियोगिता सम्पन्न भएयता १०औँ राष्ट्रिय खेलकुदको मिति तय गरिएको यो पाँचौँपटक हो। यसअघि पटक–पटक मिति घोषणा भए पनि विभिन्न कारणले प्रतियोगिता आयोजना हुन सकेको थिएन।

राखेपको १२१औँ बोर्ड बैठकले २०८१ फागुन १५ गते १०औँ राष्ट्रिय खेलकुद २०८२ जेठ ३ देखि १० गतेसम्म आयोजना गर्ने निर्णय गरेको थियो। तर, निर्धारित समयमा प्रतियोगिता सञ्चालन हुन नसकेपछि २०८१ चैत २९ गते बसेको १२२औँ बोर्ड बैठकले उक्त मिति स्थगित गरेको थियो। त्यसपछि नयाँ मिति तय हुन नसक्दा प्रतियोगिताको आयोजना अन्योलमा परेको थियो।

पछिल्लो बोर्ड बैठकले नयाँ मिति तोकेसँगै प्रतियोगिता सञ्चालनको बाटो खुलेको छ। कर्णाली प्रदेशमा पहिलोपटक आयोजना हुन लागेको राष्ट्रिय खेलकुद प्रतियोगितालाई प्रदेशका विभिन्न जिल्लामा खेलकुद पूर्वाधार विकास, खेलाडीको प्रतिभा पहिचान तथा राष्ट्रियस्तरको खेलकुद वातावरण निर्माण गर्ने अवसरका रूपमा समेत हेरिएको छ।

सुर्खेतलाई मुख्य केन्द्र बनाएर प्रतियोगिता सञ्चालन गर्ने तयारीसँगै कर्णालीका अन्य जिल्लामा पनि विभिन्न खेलका प्रतिस्पर्धा आयोजना गरिनेछन्। देशभरका प्रदेश, विभागीय टोली तथा विभिन्न क्षेत्रबाट खेलाडीको सहभागिता रहने अपेक्षा गरिएको छ।

यसअघि पटक–पटक प्रतियोगिता स्थगित हुँदा खेलाडी, प्रशिक्षक तथा खेलकुद क्षेत्रका सरोकारवालामा अन्योल बढेको थियो। नयाँ मिति घोषणा भएपछि अब प्रतियोगिताको तयारीलाई तीव्रता दिने अपेक्षा गरिएको छ।

प्रतियोगिता सफल बनाउन खेल पूर्वाधार, खेलाडीको आवास तथा प्रशिक्षण, यातायात, सुरक्षा, स्वास्थ्य र व्यवस्थापनलगायतका विषयमा समयमै तयारी पूरा गर्नुपर्ने चुनौती भने कायमै छ। विशेषगरी कर्णालीका विभिन्न जिल्लामा खेल सञ्चालन हुने भएकाले पूर्वाधार तथा व्यवस्थापनलाई प्रभावकारी बनाउनुपर्ने देखिन्छ।

राखेपले तय गरेको नयाँ कार्यतालिकाअनुसार तयारी अघि बढे १०औँ राष्ट्रिय खेलकुद प्रतियोगिता आगामी मंसिर १६ देखि २९ गतेसम्म कर्णाली प्रदेशमा सञ्चालन हुनेछ।