काठमाडौँ । नेपाल प्रहरी ले ५०९ जना प्रहरी निरीक्षक (इन्स्पेक्टर) को सरुवा गरेको छ।
नेपाल प्रहरीको मानवस्रोत विकास विभागका अनुसार प्रहरी महानिरीक्षकको जेठ २७ गतेको निर्णयअनुसार ठूलो संख्यामा प्रहरी निरीक्षकहरूको सरुवा गरिएको हो। संगठनात्मक आवश्यकता, जनशक्ति व्यवस्थापन तथा कार्यसम्पादनलाई थप प्रभावकारी बनाउने उद्देश्यले सरुवा गरिएको जनाइएको छ।
विभागले सरुवा भएका सबै प्रहरी निरीक्षकले आगामी असार महिनादेखि आफ्नो नयाँ कार्यस्थलबाट तलबभत्ता बुझ्ने व्यवस्था मिलाइएको जनाएको छ।
नेपाल प्रहरीमा एकैपटक ५०९ जना इन्स्पेक्टरको सरुवालाई पछिल्लो समयकै ठूलो जनशक्ति पुनर्संरचनामध्ये एक मानिएको छ। सरुवापछि सम्बन्धित प्रहरी कर्मचारीहरूलाई तोकिएको कार्यालय तथा इकाइमा समयमै हाजिर हुन निर्देशन दिइएको छ।
