मंगलबार, कार्तिक १७ २०८३
मंगलबार, कार्तिक १७ २०८३
शनिबार, बैशाख १९ २०८३
काठमाडौँ । धोबी खोला करिडोर आसपासका अतिक्रमित संरचनामा डोजर चल्न थालेपछि स्थानीय बासिन्दामा त्रास फैलिएको छ। सरकारी निकायले सार्वजनिक तथा अतिक्रमित जग्गा खाली गराउने अभियान तीव्र पारेसँगै क्षेत्रभर तनावको अवस्था देखिएको हो।
करिडोर क्षेत्रमा अवैध रूपमा बनेका संरचनामा डोजर चल्ने सूचना फैलिनासाथ स्थानीयले आफ्नो सम्पत्तिको सुरक्षा दाबी गर्दै घरका भित्तामा जग्गाधनी प्रमाणपत्र (लालपुर्जा) टाँस्न थालेका छन्। सम्भावित भत्काउने कार्य आफ्नो घरसम्म पुग्न सक्ने डरले उनीहरू यस्तो कदममा उत्रिएको स्थानीय बताउँछन्।
अतिक्रमित संरचना हटाउने क्रममा घरसमेत भत्किन सक्ने आशंकाले स्थानीयमा अन्योल र असन्तोष बढेको छ। कतिपयले भने वैध जग्गाधनी भए पनि स्पष्ट सीमांकन र जानकारी नहुँदा समस्या उत्पन्न भएको गुनासो गरेका छन्।
स्थानीय प्रशासनका अनुसार सार्वजनिक जग्गा संरक्षण र नदी करिडोर व्यवस्थापनका लागि अभियान सञ्चालन गरिएको हो। तर प्रभावित बासिन्दासँग समन्वय र स्पष्ट सूचनाको अभावमा त्रासको अवस्था सिर्जना भएको स्वीकार गरिएको छ।
यसबीच, स्थानीय तह र सरोकारवाला निकायबीच संवाद आवश्यक रहेको भन्दै समाधानका लागि पहल गर्नुपर्ने आवाज पनि उठ्न थालेको छ।
