शुक्रबार, साउन १५ २०८३
शुक्रबार, साउन १५ २०८३
काठमाडौं पुस, १२–
नेपाली कांग्रेसका केन्द्रीय सदस्य गगन थापाले सत्तारुढ दल नेपाल कम्युनिष्ट पार्टी (नेकपा) का दुबै अध्यक्षमा लोकतान्त्रिक अभ्यास गर्ने पद्धति नभएको आरोप लगाएका छन् । उनले नेकपाका दुबै चालक (केपी शर्मा ओली र प्रचण्ड) मा लोकतान्त्रिक अभ्यास गर्न सक्ने क्षमता नै नभएको जिकिर गरे । बिहिबार काठमाडौंमा आयोजित एक कार्यक्रममा पत्रकारहरुसँगको कुरकानीमा नेता थापाले ओली प्रचण्डसँग लोकतान्त्रिक पद्धतिअनुसार अभ्यासमा जान ‘सेट अप स्किल’नै नभएको दाबी गरे ।
बुधबार प्रचण्डले संसदमा दिएको अभिव्यक्तिप्रति इंगित गर्दै नेता थापाले ओली प्रचण्डमा अझै कम्युनिष्ट सिद्धान्तमा रहेको अधिनायवादको भूतले बेलाबेला झस्काउने गरेको बताए । नेता थापाले धर्म वैयक्तिक विषय भए पनि सनातन धर्मको रक्षा गर्ने दायित्व राज्यको भएको उल्लेख गरे । उनले सरकार समेत धर्म परिवर्तनको षडयन्त्रमा लागेको भन्दै कांग्रेस त्यसको खिलापमा उभिने उभिने प्रष्ट पारे ।
महासमिति बैठकको पूर्वसन्ध्यामा नेताहरु मर्यादासमेत बिर्सिएर आरोप प्रत्यारोपमा उत्रिएको भए पनि महासमिति बैठक सुखद अन्त्य हुनुले राम्रो सन्देश दिएको बताए । संविधानमा अपनत्व लिएर संविधानको सार्थक कार्यान्वयनमा काँग्रेस लाग्छ भन्ने कुराको सन्देश महासमिति बैठकले दिएको उनले दाबी गरे ।
महासमिति बैठकबाट सभापति शेरबहादुर देउवा र वरिष्ठ नेता रामचन्द्र पौडेलबीचको भावनात्मक एकता भएको भन्ने विषयमा नेता थापाले भने, ‘नेताहरूको लभ होइन विवाह आवश्यक छ । लभ सानो कुराले टुंगिन सक्छ । विवाह भयो भने त्यो सम्बन्ध संस्थागत हुन्छ ।’
उनले थपे, ‘ हामी हेर्छौं सभापति र वरिष्ठ नेताको लभ विवाहसम्म पुग्छ कि लभमा मात्र सिमित हुन्छ । ’ साथै नेता थापाले गुट नभएको पार्टीको कल्पना गर्नु हावादारी कुरा हुने बताए । उनले भने, ‘गुट उपगुट हुनु स्वभाविक हो । तर गुट गिरोहमा रुपान्तरण हुँदा समस्या भएको हो ।’
पार्टीमा विधानको सर्वोच्चता रहने भन्दै पार्टी अब व्यक्तिको रहरमा नभई विधानको आधारमा चल्नुपर्नेमा उनले जोड दिए ।
