बिहिबार, साउन १४ २०८३
बिहिबार, साउन १४ २०८३
काठमाडौं पुस, २१–
पूर्व प्रधानमन्त्री समेत रहेका एमालेका बरिष्ठ नेता झलनाथ खनालले पदको कारणले एमाले–माओवादी एकताले गति लिन नसकेको बताएका छन् । एक व्यक्ति एक पदकै कारण पार्टी एकता र प्रधानमन्त्रीको नाम टुंगो लगाउने प्रक्रियामा गाँठो परेको नेता खनालको भनाई छ । शुक्रबार झापाको बिर्तामोडमा पत्रकारहरुसँग कुराकानी गर्दै नेता खनालले पार्टी एकताको प्रक्रिया प्याकेजमै टुंग्याउने प्रयासमा आफूहरु रहेको समेत जानकारी गराए ।
उनले भने, ‘एक व्यक्ति एक पद चाहिँ भन्न मात्र सजिलो, कार्यान्वयन गर्न गाह्रो रहेछ,’ खनालले थपे, ‘अहिले पनि यसैमा गाँठो परेको छ । तर, जति नै गाँठो परे पनि फुकाइन्छ, सुपारी गाँठै भएपनि केही फरक पर्दैन ।’ उनको आशय आफ्नै पार्टीका अध्यक्षले प्रधानमन्त्री र पार्टी अध्यक्ष दुवैै हुन खोजेकाले प्रक्रिया अल्झिएको भन्ने जस्तो रहेको थियो ।
खनालले पार्टी एकीकरणका विषयमा दोस्रो र तेस्रो तहका नेता पनि सक्रिय रहेकाले अझ राम्रो लक्षण देखिएको बताए ।
