बिहिबार, साउन १४ २०८३
बिहिबार, साउन १४ २०८३
काठमाडौं कात्तिक,२५–
शनिबार निधन भएका पूर्वप्रधानमन्त्री कीर्तिनिधि विष्टको आजै अन्त्यष्टि गरिएको छ ।
उनको राजकीय सम्मान बिनै अन्त्येष्टि गरिएको हो । लामो समयदेखि क्यान्सर रोगबाट पीडित विष्टको ज्ञानेश्वरस्थित आफ्नै निवासमा शनिबार विहान निधन भएको थियो ।
परिवारको इच्छा बमोजिम उनको अन्त्यष्टि साधारण ढंगले गरिएको हो । पूर्वप्रधानमन्त्री समेत रहेका विशिष्ट व्यक्तिको निधनमा राजकीय सम्मानका साथ अन्त्येष्टि गर्ने प्रचलन रहेको छ । उनको पार्थिव शरीरलाई पशुपति आर्यघाटस्थित साझा चितामा जलाइएको थियो ।
९१ वर्षको उमेरमा निधन भएका भएका पूर्वप्रधानमन्त्री विष्ट निष्ठावान राजनीतिज्ञ थिए।
राजनीति शास्त्रमा स्नातकोत्तर गरेका स्वर्गीय बिष्ट पिता चन्द्रनिधि र माता धनकुमारीको कोखबाट जन्म १५ जनवरी १९२७ मा जन्मिएका थिए ।
राजनीतिसम्बन्धी लेखहरू लेख्दै राजनीतिज्ञ डिल्लीरमण रेग्मीसँगको सङ्गतबाट राजनीतिमा सरिक भएका बिष्टले नेपाली राष्ट्रिय काँग्रेसबाट राजनीतिक यात्रा शुरु गरेका थिए । उनी जहानियाँ राणा शासनविरुद्धको विसं २००७ को क्रान्तिमा सक्रियतापूर्वक लागेका थिए ।
सन् १९५८ मा परामर्शदात्री सभाको सदस्य भएका विष्ट सन् १९६१ मा सहायक मन्त्री, मन्त्री हुँदै विसं २०२५–२०२६, २०२८–२०३० र २०३४–२०३६ सालमा तीन पटकसम्म प्रधानमन्त्री भएका थिए ।
विसं २०६१ मा माघ १९ गते ज्ञानेन्द्र शाहले प्रत्यक्ष शासन सञ्चालन गरेपछि उनलाई विसं २०६१ फागुनमा उपाध्यक्षमा नियुक्त गरेका थिए ।
विसं २०३० मा सिंहदरबार आगलागी हुँदा नैतिकताको कारण राजीनामा दिई नेपालको इतिहासमा चर्चित भएका उपाध्यक्ष विष्टले नै चुनावमा भाग लिँदा आफ्नो पदबाट राजीनामा दिने चलनको शुरुवात गरेका थिए ।
विसं २००७ मा प्रजातन्त्र पुनःस्थापनापछि गठित राष्ट्रिय जनता परिषद्को उपसभापति र सभापति पनि रहेका साथै सोही पार्टीबाट उनी विसं २०१५ फागुन गते भएको काठमाडौँ–३ मा प्रतिनिधिसभाका लागि उम्मेदवार बनेका थिए ।
सन् १९९६ मा प्रतिनिधिसभाले महाकाली सन्धि अनुमोदन गर्दा विरोध प्रदर्शन गरेबापत उनी पक्राउ परेका थिए । उनले चीन, भारत, पाकिस्तान, रुस, उत्तर कोरिया, अष्ट्रिया, जापान, मलेसिया, जर्मनी, फ्रान्स, नेदरल्याण्डस्, संयुक्त राज्य अमेरिका, इण्डोनेसिया र ब्राजिलको भ्रमण गर्नुका साथै राष्ट्रसंघको महासभामा नेपाली प्रतिनिधिमण्डलको नेतृत्व पनि गरेका थिए ।
उनको दुई छोरा र तीन छोरी छन् । दुई वर्ष अघि उनको श्रीमती र एक छोराको निधन भएको थियो ।
उनको अन्तिम बिदाईका लागि उपप्रधानमन्त्री कमलथापासहित पञ्चायत पृष्ठभूमिका नेता तथा शुभेच्छुक पशुपति आर्यघाट पुगेका थिए ।
