बुधबार, कार्तिक ११ २०८३
बुधबार, कार्तिक ११ २०८३
बुधबार, असोज २८ २०८३
सिद्धार्थ बैंक लिमिटेडको २५ औँ वार्षिक साधारण सभा सम्पन्न भएको छ । बैंकका सञ्चालक समितिका अध्यक्ष राहुल अग्रवालको अध्यक्षतामा बुधबार काठमाडौंको भद्रकालीस्थित आर्मी अफिसर्स क्लबमा सम्पन्न सभाले सेयरधनीलाई १० प्रतिशत बोनस सेयर र १० प्रतिशत नगद लाभांश वितरण गर्ने प्रस्ताव पारित गरेको छ ।
सभाले बैंकको हाल कायम साधारण सेयरतर्फको चुक्ता पुँजी १४ अर्ब ७९ करोड ४४ लाख ७९ हजार एक सय ९५ रुपैयाँको १० प्रतिशतका दरले हुने एक अर्ब ४७ करोड ९४ लाख ४७ हजार नौं सय २० रुपैयाँ बराबरको बोनस सेयर जारी गर्ने प्रस्ताव पारित गरेको हो । त्यसैगरी, बैंकले १० प्रतिशतका दरले एक अर्ब ४७ करोड ९४ लाख ४७ हजार नौं सय २० रुपैयाँ नगद लाभांश वितरण गर्ने प्रस्ताव पनि सभाबाट पारित गरेको छ । उक्त नगद लाभांशमा बोनस सेयर तथा नगद लाभांशको कर प्रयोजनका लागि आवश्यक रकमसमेत समावेश रहनेछ ।
यसैगरी, बैंकको अविमोच्य असञ्चिति अग्राधिकार सेयरधनीलाई आठ दशमलव २५ प्रतिशतका दरले नगद लाभांश वितरण गर्ने प्रस्ताव पनि सभाले पारित गरेको छ । बैंकको अग्राधिकार सेयरतर्फको चुक्ता पुँजी तीन अर्ब ५० करोड रुपैयाँका आधारमा कर प्रयोजनसहित १० करोड ७५ लाख ८९ हजार ४१ रुपैयाँ लाभांश वितरण गरिनेछ । उक्त लाभांश सेयर बाँडफाँड भएको मितिदेखि २०८३ साल असार मसान्तसम्मको एक सय ३६ दिनका लागि समानुपातिक रूपमा वितरण गर्ने प्रस्ताव पारित भएको हो ।
सभाले आर्थिक वर्ष २०८२/८३ का लागि सञ्चालक समितिको वार्षिक प्रतिवेदन, लेखापरीक्षकको प्रतिवेदनसहित २०८३ साल असार मसान्तको वित्तीय अवस्थाको विवरण, नाफा–नोक्सान विवरण, नगद प्रवाह विवरण तथा स्वपुँजी (इक्विटी) मा भएको परिवर्तनसम्बन्धी विवरण पनि पारित गरेको छ ।
त्यसैगरी, सभाले बाह्य लेखापरीक्षक नियुक्त गर्ने र निजको पारिश्रमिक निर्धारण गर्ने लगायतका प्रस्तावसमेत पारित गरेको बैंकले जनाएको छ ।
वार्षिक साधारण सभामार्फत लाभांश वितरण तथा वित्तीय विवरणसम्बन्धी प्रस्ताव पारित भएसँगै बैंकले आर्थिक वर्ष २०८२/०८३ को वित्तीय तथा संस्थागत गतिविधिसम्बन्धी विषयलाई औपचारिक रूपमा अनुमोदन गरेको छ ।
