मंगलबार, कार्तिक १० २०८३
मंगलबार, कार्तिक १० २०८३
कुन प्रदेशमा कसलाई जिम्मेवारी?
बिहिबार, असोज ८ २०८३
काठमाडौं । नेपाली कांग्रेसका निवर्तमान सभापति शेरबहादुर देउवा समूहले समानान्तर महाधिवेशनको तयारी तीव्र बनाउँदै ५५ जिल्लामा संयोजक तोकेको छ।
पूर्वमहामन्त्री डा. शशांक कोइरालाको संयोजकत्वमा रहेको १५औँ महाधिवेशन आयोजक समितिले जिल्लागत संयोजक तोकेको हो। संयोजकहरूलाई डा. कोइरालाले हस्ताक्षर गरेको पत्र दिइएको नेता एनपी साउदले जानकारी दिनुभयो।
देउवा समूहले असोज १५ गते वडा अधिवेशन सुरु गर्ने तथा मंसिर २१ देखि २३ गतेसम्म केन्द्रीय महाधिवेशन गर्ने कार्यतालिका अघि सारेको छ। यसअघि पनि समूहले छुट्टै महाधिवेशनका लागि जिल्ला तहसम्म प्रतिनिधि परिचालन गरिसकेको थियो।
पाँचथरमा डेकेन्द्रकुमार तामाङ, झापामा कृष्ण हुमागाईं, संखुवासभामा रामकुमार जीसी, भोजपुरमा धर्मराज राई, मोरङमा सुभाष पौडेल, खोटाङमा रोजन राई, ओखलढुंगामा बालगोविन्द राजभण्डारी र उदयपुरमा बसन्त बस्नेतलाई संयोजक तोकिएको छ।
मोरङमा विनायक पन्त र उदयपुरमा गोविन्द चाम्लिङलाई सहसंयोजकको जिम्मेवारी दिइएको छ।
दोलखामा ताराबहादुर खड्का, रामेछापमा जीतबहादुर मगर, रसुवामा उपेन्द्र लम्साल, धादिङमा गोपाल बिक, नुवाकोटमा श्रीराम श्रेष्ठ, सिन्धुपाल्चोकमा लालकाजी तामाङ, चितवनमा मिलन श्रेष्ठ, मकवानपुरमा भीम लामा, भक्तपुरमा दुर्लभ थापा, ललितपुरमा सुदर्शन घिमिरे र काठमाडौंमा जयकृष्ण महर्जनलाई संयोजक बनाइएको छ।
दोलखामा जयराम श्रेष्ठ सहसंयोजक छन्।
गोरखामा भुगोल थापा, लमजुङमा रामकृष्ण कँडेल, कास्कीमा ऋषिराम काफ्ले, मनाङमा नाचोङ गुरुङ, पर्वतमा रामकृष्ण मल्ल, म्याग्दीमा हिराबहादुर पुन मगर, बागलुङमा सागर छन्त्याल र नवलपुरमा अशोक बस्ताकोटीलाई संयोजकको जिम्मेवारी दिइएको छ।
नवलपरासी पश्चिममा विकास घिमिरे, रुपन्देहीमा गुनाखर भुर्तेल, कपिलवस्तुमा अब्दुल मन्नान खाँ, पाल्पामा माधव नेपाल, अर्घाखाँचीमा लक्ष्मण पाण्डे, गुल्मीमा बेदबहादुर थापा, रुकुम पूर्वमा दत्तबहादुर बस्नेत, रोल्पामा मानबहादुर खत्री, प्युठानमा ईश्वरसिंह विष्ट, दाङमा गोपालराज शर्मा, बाँकेमा कृष्ण कार्की र बर्दियामा जग्गाप्रसाद पाण्डेलाई संयोजक तोकिएको छ।
डोल्पामा देउप्रसाद बुढा, जुम्लामा हेम बुडथापा, मुगुमा कर्ण रावल, हुम्लामा सूर्यबहादुर शाही, कालिकोटमा मातृका सिंह, जाजरकोटमा राजजंग शाह, दैलेखमा मीनबहादुर विश्वकर्मा ‘मिलन’ र सुर्खेतमा ललित भट्टराईलाई संयोजक बनाइएको छ।
बाजुरामा धनराज पण्डित, बझाङमा हर्कजंगबहादुर सिंह, डोटीमा नरेन्द्रबहादुर सिंह, दार्चुलामा सुरेन्द्र अवस्थी, बैतडीमा वीरबहादुर विष्ट, डडेलधुरामा डिल्लीराज जोशी, कञ्चनपुरमा पदम बोगटी र कैलालीमा खेमबहादुर डगौरा थारूलाई संयोजक तोकिएको छ।
कैलालीमा रामसमझ राना सहसंयोजक छन्।
मधेस प्रदेशका कुनै पनि जिल्लामा हालसम्म संयोजक तोकिएको छैन।
नेता एनपी साउदका अनुसार तोकिएका जिल्ला संयोजकहरूले सम्बन्धित जिल्लामा महाधिवेशनको तयारी तथा संगठनसम्बन्धी आवश्यक काम अघि बढाउनेछन्।
देउवा समूहले अघि सारेको कार्यतालिकाअनुसार असोज १५ गते वडा, असोज २० गते पालिका, असोज २३ गते क्षेत्रीय, कात्तिक १५ गते जिल्ला र मंसिर ४ गते प्रदेश अधिवेशन गर्ने तयारी छ। त्यसपछि मंसिर २१ देखि २३ गतेसम्म काठमाडौंमा केन्द्रीय महाधिवेशन गर्ने कार्यक्रम समूहले अघि सारेको छ।
यससँगै नेपाली कांग्रेसको महाधिवेशन प्रक्रियामा दुई छुट्टाछुट्टै कार्यतालिका अघि बढिरहेका छन्। संस्थापन पक्षले असोज १६ देखि १९ गतेसम्म केन्द्रीय महाधिवेशन गर्ने प्रक्रिया अघि बढाएको छ भने देउवा समूहले मंसिरमा छुट्टै महाधिवेशन गर्ने तयारी गरिरहेको छ।
