बिहिबार, साउन १४ २०८३
बिहिबार, साउन १४ २०८३
काठमाडौं साउन, ६– वर्षको ११ वटा महिनामा खर्च नै गर्न नसकेको सरकारले वर्षको अन्त्यमा आएर भने खर्च ह्वात्तै वृद्धि गरेको देखिन्छ । गत आर्थिक वर्षमा सरकारले बिकासका लागि छुट्टाएको बजेट २ खर्ब ७२ अर्ब मध्ये ८७ दशमलव ३८ प्रतिशत खर्च गरेको छ ।
असारको दोस्रो सातासम्म पनि ५० प्रतिशत रकम खर्च गर्न नसकेको सरकारले अन्त्यमा आएर ह्वात्तै खर्च वृद्धि गरेको हो । अन्त्यमा भएको खर्च लुकाउनका लगि सरकारले केहि दिन खर्चको विवरण नै देखाएन । अहिले पनि महालेखा नियन्त्रकको कार्यालयले अहिलेसम्म कति खर्च भयो भनेर मात्रै देखाएको छ । तर , महालेखा कार्यालयको वेवसाइटमा यसअघि दैनिक आय र व्ययको विवरण देखिन्थ्यो ।
वर्षको अन्त्यमा प्रत्येक दिन कति खर्च गरियो भनेर सरकारले लुकाउन चाहेको छ । जसका लागि नै महालेखा नियन्त्रक कार्यालयको वेबसाइट नै तोडमोड गरेको छ
बिकास खर्च गर्न नसकेको सरकारले राजस्व भने लक्ष्य अनुरुप नै असुल गरेको छ ।
सरकारले गत आर्थिक वर्षमा ८ खर्ब ६० अर्ब असुल गर्ने लक्ष्य लिएको थियो । जसमध्ये ८ खर्ब ५९ अर्ब असुल गरेको छ जुन लक्ष्यकै हाराहारीमा हो ।
चालु खर्च पनि सरकारले उल्लेखनिय रुपमा खर्च गरेको छ । कर्मचारीको तलब भत्ता तथा प्रशासनिक खर्च अर्थात चालु खर्च सरकारले गत वर्ष ९१ प्रतिशत खर्च गरेको छ ।
त्यसैगरि सरकारले बैदेशिक ऋण तथा सहायता भने उल्लेखनिय रुपमा भित्राउन नसकेको देखिन्छ । बैदेशिक सहायता लक्ष्यको ५१ प्रतिशत भित्राएको सरकारले ऋण ५६ प्रतिशत भित्राएको छ ।
वर्षको अन्त्यमा आएर भएको खर्च के कहाँ खर्च भयो भनेर अनुगमन गर्न जरुरी छ । सरकारले वर्षको अन्त्यमा आएर गलत ठाउमा समेत खर्च गर्ने गरेको देखिन्छ ।
आकडा तोडमोड गरेर जनमत जुटाउने प्रंयासमा रहेको सरकारले खर्चमा केहि बृद्धि गरेको त देखाएको छ । तर, यो खर्च कहाँ के मा भयो भनेर खोज्ने जिम्मेवारी अब महालेखापरिक्षकको हो ।
