मंगलबार, कार्तिक १० २०८३
मंगलबार, कार्तिक १० २०८३
शुक्रबार, असोज ३० २०८३
बिहीबार पार्टी केन्द्रीय कार्यालय च्यासलमा एमालेको नीति अध्ययन तथा अनुसन्धान प्रतिष्ठानको वेबसाइट सार्वजनिक गर्दै ओलीले आफ्नो कार्यकालमा अघि सारिएका सामाजिक सुधारका कार्यक्रमलाई समाजवादउन्मुख राज्य निर्माणका प्रयासका रूपमा व्याख्या गरे ।
उनले सडक बालबालिकाको उद्धार तथा व्यवस्थापन, सहयोगापेक्षी सडक मानवको संरक्षण र सडकमा भिक्षा माग्नुपर्ने अवस्थाको अन्त्य गर्ने प्रयासलाई नागरिकप्रति जिम्मेवार सरकारको अवधारणासँग जोडे ।
ओलीले ज्येष्ठ नागरिक भत्ता, स्वास्थ्य बीमा तथा बालबालिकाका लागि सञ्चालन गरिएको ‘खोलौँ खाता’ अभियानलगायत कार्यक्रमलाई मानवतावादी सोचबाट प्रेरित सामाजिक सुरक्षाका पहलका रूपमा चर्चा गरे । शारीरिक रूपमा अशक्त, अपाङ्गता भएका व्यक्ति, असहाय, बेसहारा तथा ज्येष्ठ नागरिकको संरक्षण गर्नु राज्यको दायित्व भएको उनले बताए ।
‘समृद्ध नेपाल, सुखी नेपाली’को लक्ष्य प्राप्त गर्ने क्रममा सामाजिक क्षेत्रमा विभिन्न काम गरिएको उल्लेख गर्दै ओलीले पछिल्ला घटनाक्रमले लक्ष्य प्राप्तिको यात्रा पछाडि धकेलिए पनि त्यसलाई हारका रूपमा लिन नहुने बताए ।
सरकारको जिम्मेवारी हिसाबकिताब र जवाफदेहितामा मात्र सीमित नहुने उल्लेख गर्दै उनले नागरिकप्रति आत्मीयता र संवेदनशीलताका साथ प्रस्तुत हुनुपर्ने धारणा राखे । आमाले आफ्ना सन्तानको हेरचाह गरेझैँ सरकारले पनि नागरिकको संरक्षण र कल्याणमा ध्यान दिनुपर्ने उनको भनाइ थियो ।
आफ्नो कार्यकालमा भएका विकास निर्माण तथा सामाजिक कार्यमाथि हुने आलोचनाको प्रसङ्ग उल्लेख गर्दै ओलीले नागढुङ्गा क्षेत्रमा राखिएको साइनबोर्डसम्बन्धी विवादलाई सामान्य प्राविधिक विषयका रूपमा व्याख्या गरे । साइनबोर्ड हटाउँदैमा आफूहरूले गरेका सामाजिक कामको महत्त्व र त्यसले समाजमा पारेको प्रभाव समाप्त नहुने उनको तर्क थियो ।
समृद्धिको यात्राबारे धारणा राख्दै ओलीले नागरिकलाई सुखी बनाउन पहिले उनीहरूका दुःख निवारण गर्नुपर्नेमा जोड दिए । गरिबी, अभाव र असहाय अवस्थाको अन्त्य गर्दै नागरिकका आधारभूत आवश्यकता पूरा गर्ने वातावरण निर्माण गर्नु नै समृद्धिको आधार भएको उनले बताए ।
‘सुखी नेपाली बनाउने हो भने पहिले जनताका दुःख निवारण गर्नुपर्छ । गरिबी, अभाव र असहाय अवस्थाको अन्त्य गर्दै नागरिकका आधारभूत आवश्यकता पूरा गर्ने वातावरण बनाउनुपर्छ,’ ओलीले भने, ‘पहिले दुःख निवारण, त्यसपछि सुख प्राप्ति—यही सोचका साथ हामीले सामाजिक न्याय र समृद्धिको बाटो अघि बढाएका थियौँ ।’
