मंगलबार, कार्तिक १० २०८३
मंगलबार, कार्तिक १० २०८३
शुक्रबार, असोज १६ २०८३
काठमाडौँ । बीसौँ एसियाली खेलकुदमा सहभागी नेपाली राष्ट्रिय पुरुष क्रिकेट टोली स्वदेश फर्किएको छ। नेपाली टोली आज राति जापानको टोकियोबाट काठमाडौं आइपुगेको हो।
स्वदेश फर्किएको नेपाली टोलीलाई नेपाल क्रिकेट संघ (क्यान)का पदाधिकारीले विमानस्थलमा स्वागत गरेका थिए।
नेपालले यसपटकको एसियाली खेलकुदमा पदक जित्न नसके पनि समूह चरणमा उल्लेखनीय प्रदर्शन गरेको थियो। नेपालले टेस्ट राष्ट्र अफगानिस्तानलाई १२ वर्षपछि पराजित गर्दै पाँच विकेटको जित निकालेको थियो।
समूह चरणको अन्तिम खेलमा भने वर्षा बाधक बनेपछि आयोजक जापानसँग नेपालले अंक बाँडेको थियो। समूह विजेताका रूपमा क्वार्टरफाइनलमा पुगेको नेपालले अन्तिम आठमा श्रीलङ्काको सामना गरेको थियो।
नेपाल र श्रीलङ्काबीचको क्वार्टरफाइनल खेल वर्षाका कारण प्रभावित भएपछि नेपाल प्रतियोगिताबाट बाहिरिएको हो। वर्षाका कारण खेलको नतिजा प्रभावित हुँदा अन्तर्राष्ट्रिय टी–२० वरीयतामा नेपालभन्दा अगाडि रहेको श्रीलङ्कालाई फाइदा पुगेको थियो।
एसियाली खेलकुदको क्रिकेटमा नेपालले हालसम्म क्वार्टरफाइनल चरण पार गर्न सकेको छैन। यसपटक पनि समूह चरणमा प्रभावशाली प्रदर्शन गरे पनि वर्षाका कारण अन्तिम आठबाटै प्रतियोगिताको यात्रा टुङ्गिएको हो।
