शुक्रबार, भाद्र २६ २०८३
शुक्रबार, भाद्र २६ २०८३
सोमबार, भाद्र २२ २०८३
काठमाडौं । अमेरिकाको मायामी अन्तर्राष्ट्रिय विमानस्थलमा अमेजनका लागि सञ्चालन गरिएको कार्गो विमान दुर्घटना हुँदा कम्तीमा पाँच जनाको मृत्यु भएको छ। दुर्घटनामा अन्य पाँच जना घाइते भएका छन्, जसमध्ये तीन जनाको अवस्था गम्भीर रहेको अधिकारीहरूले बताएका छन्।
स्थानीय समयअनुसार आइतबार दिउँसो करिब २ बजे अवतरणका क्रममा बोइङ ७६७–३०० विमान धावनमार्गबाट बाहिर गएको थियो। विमानले धावनमार्ग बाहिर रहेका कैयौँ सवारीसाधनलाई ठक्कर दिएपछि आगलागी भएको थियो।
विमान सान हुआन, पोर्टो रिकोबाट मायामीका लागि आएको थियो। उक्त कार्गो विमान अमेजन एयरका लागि २१ एयरले सञ्चालन गरिरहेको थियो।
दुर्घटनाको प्रारम्भिक सूचना पाएलगत्तै मायामी–डेड अग्निनियन्त्रण तथा उद्धार सेवाका ६० भन्दा बढी युनिट र करिब २०० जना उद्धारकर्मी घटनास्थलमा पुगेका थिए। विमानमा लागेको आगो नियन्त्रणमा लिएर उद्धार तथा राहत कार्य अघि बढाइएको थियो।
घाइतेमध्ये केही विमानले ठक्कर दिएका सवारीसाधनमा रहेका व्यक्ति रहेको अधिकारीहरूले बताएका छन्। दुर्घटनामा मृत्यु भएका तथा घाइतेहरूको पहिचान भने तत्काल सार्वजनिक गरिएको छैन।
दुर्घटनाको कारण खुलिसकेको छैन। अमेरिकी संघीय उड्डयन प्रशासन र राष्ट्रिय यातायात सुरक्षा बोर्डले घटनाबारे अनुसन्धान थालेका छन्। राष्ट्रिय यातायात सुरक्षा बोर्डको टोली अध्यक्ष जेनिफर होमन्डीको नेतृत्वमा घटनास्थलतर्फ गएको जनाएको छ।
दुर्घटनापछि मायामी अन्तर्राष्ट्रिय विमानस्थलको उडान सञ्चालनमा समेत केही समय अवरोध भएको थियो। अमेजनले घटनाप्रति दुःख व्यक्त गर्दै स्थानीय प्रशासन तथा सम्बन्धित अधिकारीसँग समन्वय गरी दुर्घटनाबारे थप तथ्य पत्ता लगाउने र प्रभावितलाई सहयोग गर्ने जनाएको छ।
